Употребата на енергетските пијалаци и спортската храна е темата која предизвика голем интерес и интеракција меѓу учениците од средното училиште „Нико Нестор“ во Струга.

Тие учествуваа на едукативната работилница на Агенцијата за храна и ветеринарство (АХВ) која се одржа во рамки на Програмата на Владата за заштита на потрошувачите.

Преку интерактивна презентација, присутните ученици се запознаа со основните принципи на безбедност на храната, означувањето на прехранбените производи, балансираната исхрана со фокус на потенцијалните ризици поврзани со прекумерна или неконтролирана употреба на спортска храна и енергетски пијалаци, од аспект на заштита на сопственото здравје како потрошувачи.

Учениците да бидат совесни како потрошувачи и да не наседнуваат на непроверени и непотврдени информации за продажба на додатоци во исхраната, разни чаеви за слабеење и слично преку социјалните мрежи и веб платформи на нерегистрирани/неодобрени оператори, бидејќи производите кои таму се нудат можат да бидат и штетни за нивното здравје
- беше потенцирано на работилницата.

Со оваа активност се потврди континуираната заложба на Агенцијата за храна и ветеринарство за едукација на потрошувачите и подигнување на свеста за важноста од правилно информирање при купување и користење на храната.