Заменик директорот на Агенцијата за храна и ветеринарство Фирус Мемед и претставници од Одделението за заштита на потрошувачите, денес одржаа работен состанок со првите луѓе на Организацијата на потрошувачи на Македонија, здружението на агроновинари на Република Северна Македонија Медиа плус и Асоцијацијата за развојни иницијативи – Зенит. Претставниците на невладиниот сектор го образложија проектот „Преминете на органско – потрошувачите во центарот на земјоделската политика“, што е финансиран од Европската унија, кој заедно го реализираат трите невладини организации.

Во негови рамки, објаснија тие, изработена е и мобилната апликација „Органски пат – побезбедна и одржлива храна за сите“ преку која може да се врши пребарување, контактирање и планирање на посета на производителите на органска храна во Република Северна Македонија. На апликацијата се лоцирани и ресторани, продавници, сместувачки или туристички објекти кои нудат органска храна во своите понуди, а кои според оценката на реализаторите на проектот во земјава се уште се во мал број и на чиј развој, преку соработка на институциите и невладиниот сектор, активно треба да се работи во иднина.

Заменик директорот Мемед ја поздрави реализацијата на проектот и посочи дека Агенцијата за храна и ветеринарство останува отворена за соработка и институционална поддршка, во насока на интензивирање на активностите кои и досега ги има воспоставено со невладините организации. Стручни лица од Агенцијата ја објаснија постапката за контрола на органските производи во прометот и реализирањето на Програмата за мониторирање на безбедноста на храната која ги опфаќа и оваа категорија производи.